जालना: आदिवासी निवासी शाळेत 8 वर्षीय बाळवीर पवारचा खून; ऑल इंडिया पँथर सेनेची सखोल चौकशीची मागणी!
जालना, दि. 23 जुलै 2025: जालना जिल्ह्यातील भोकरदन येथील गणपती विद्यालयांतर्गत असलेल्या आदिवासी निवासी शाळेत एक धक्कादायक घटना समोर आली आहे. येथे दुसरीत शिकणारा 8 वर्षीय विद्यार्थी बाळवीर पवार याचा गळा आवळून खून करण्यात आला आहे. ही घटना उघडकीस आल्यानंतर परिसरात खळबळ उडाली असून, आदिवासी आणि दलित समाजाच्या मुलांच्या सुरक्षिततेवर प्रश्नचिन्ह उपस्थित झाले आहे.
बाळवीर पवार हा अतिशय गरीब कुटुंबातील मुलगा होता. त्याच्या पालकांनी त्याला उज्ज्वल भविष्यासाठी वस्तीगृहात दाखल केले होते, जेणेकरून त्याला शिक्षण घेता येईल आणि दारिद्र्याच्या चक्रातून बाहेर पडता येईल. मात्र, या वस्तीगृहातच त्याचा क्रूरपणे खून झाल्याने आदिवासी समाजात संतापाची लाट पसरली आहे. बाळवीरला रुग्णालयात नेल्यानंतर त्याचा मृत्यू झाल्याचे निष्पन्न झाले. पोलिसांच्या प्राथमिक तपासानुसार, त्याच्यासोबतच्या काही अल्पवयीन मुलांनी त्याचा गळा आवळून खून केल्याचा दावा केला जात आहे. मात्र, या प्रकरणात अनेक शंका उपस्थित झाल्या आहेत.
**राजकीय कनेक्शनमुळे संशय** ही संस्था काँग्रेसचे जिल्हाध्यक्ष देशमुख यांच्याशी संबंधित असल्याने या प्रकरणात राजकीय हस्तक्षेपाचा संशय व्यक्त केला जात आहे. यामुळे या खुनाच्या मागील सत्य समोर येण्यासाठी सखोल चौकशीची गरज आहे, असे मत ऑल इंडिया पँथर सेनेने व्यक्त केले आहे.
**ऑल इंडिया पँथर सेनेची मागणी** ऑल इंडिया पँथर सेनेने या प्रकरणात तात्काळ आणि पारदर्शक कारवाईची मागणी केली आहे.
त्यांनी पुढील मागण्या केल्या आहेत:
1. बाळवीर पवारच्या कुटुंबाला 25 लाख रुपयांची आर्थिक मदत द्यावी.
2. कुटुंबातील एका सदस्याला शासकीय नोकरी द्यावी.
3. कुटुंबाला तात्काळ पोलीस संरक्षण पुरवावे.
4. या प्रकरणाची सीआयडी किंवा विशेष तपास पथकामार्फत (SIT) सखोल चौकशी करावी.
5. आरोपींना कठोर शिक्षा करा
पोलिसांवर दबाव** ऑल इंडिया पँथर सेनेने पोलिसांनी वरवरचा तपास न करता सखोल चौकशी करावी आणि सत्य समोर आणावे, अशी मागणी केली आहे. या प्रकरणात अल्पवयीन मुलांचा सहभाग असल्याचा दावा केला जात असला, तरी राजकीय नेत्यांशी संबंधित संस्थेच्या पार्श्वभूमीमुळे संपूर्ण प्रकरणाची निष्पक्ष चौकशी आवश्यक आहे.या घटनेने आदिवासी निवासी शाळांमधील सुरक्षेचा प्रश्न ऐरणीवर आला असून, याप्रकरणी पुढील कारवाईकडे सर्वांचे लक्ष लागले आहे.
ऑल इंडिया पँथर सेनेचे भोकरदन तालुका अध्यक्ष किशोर शेजवळ यांनी यासंदर्भात आंदोलनाचा इशारा दिला आहे!
