महाराष्ट्रातील साखर कारखान्यांच्या निवडणुकीत अजित पवार यांच्या नेतृत्वाखालील राष्ट्रवादी काँग्रेस पक्षाने पूर्णपणे वर्चस्व गाजवले आहे, तर शरद पवार यांच्या राष्ट्रवादी काँग्रेस पक्षाने (NCP-SCP) या निवडणुकीत सहभाग घेतलेला नाही.
यावर वंचित बहुजन आघाडीचे राष्ट्रीय अध्यक्ष प्रकाश आंबेडकर यांनी तीव्र टीका केली आहे. आंबेडकर यांनी म्हटलं, “साखर कारखान्यांच्या निवडणुकीत शरद पवार यांचा पक्ष कुठेही दिसत नाही. अजित पवार यांनी सर्व सूत्रे हाती घेतली असून, सहकार क्षेत्रातील राजकारणात त्यांचा प्रभाव स्पष्ट दिसतो आहे. ही परिस्थिती म्हणजे ‘लग्न न झालेल्या नवरा-नवरीचा एकत्र संसार’ असल्यासारखी आहे. हा राजकीय जोडा खरोखरच आश्चर्यकारक आहे!”
आंबेडकर यांनी पुढे सांगितलं की, सहकार क्षेत्रातील हे बदल महाराष्ट्राच्या राजकीय समीकरणांवर मोठा परिणाम करू शकतात. त्यांनी शरद पवार यांच्या पक्षाच्या या निवडणुकीतील अनुपस्थितीवर प्रश्नचिन्ह उपस्थित केलं आणि यामागील रणनीतीबाबत स्पष्टीकरणाची मागणी केली. “सहकार क्षेत्रातील निवडणुका ही राजकीय शक्तीप्रदर्शनाचा भाग असतात. पण यावेळी शरद पवार यांचा पक्ष पूर्णपणे गायब आहे, हे धक्कादायक आहे,” असं आंबेडकर म्हणाले.
प्रतिनिधी, २४ मे २०२५
